إسمى YomNa Aly
أو أبلة فانيليا .. الاسم الاقرب إلى قلبى و بقيت أتنادى به أكتر من إسمى الحقيقى ♥️
عندى 38 سنة .. كل سنة كنت بقابل تحدى و عقبة أكبر من السنه اللى قبلها .. بس عمرى ما زعلت لان مع كل تحدى او مع كل مرة كنت بقع فيها .. بلاقى ربنا محاوطنى بسكينة و طمأنينة من عنده .. وباخد وقتى و أرجع أقوم من تانى أقوى و أحسن من الأول ..
و دى بعتبرها نقطة قوتى
طلعت و إتربيت فى بيت بيعشق الراديو بكل برامجه .. و على رأسهم أبلة فضيلة .. إتأثرت بيها و بالرقى و الجمال فى كلامها و السلاسة فى طريقة حكيها للحواديت و الحنية اللى فى صوتها .. كل ده اللى كان مخلينى أستسلم و أسلم لكل حاجة حلوة كانت بتحاول توصلها فى حواديتها ..
و ده خلانى من 8 سنين اشتغلت مذيعة فى راديو قدمت فيهم برنامجيين معتزة بكل حلقة فيهم جدااا لحد دلوقتى .. لانى كنت بقدم فيهم رسالة و معنى
و كانت من اكتر الفترات فى حياتى اللى حسيت انى بشتغل الحاجة اللى بحبها
وبعد كدة حياتى أخدت شكل تانى خاالص لظروف كتير
بعدها بدأت أشتغل مع الاطفال من اول UC Math و الورش الفنية و دخلت على تعليم النظام للام و الطفل .. من تنظيم الميزانية و تنظيم الوقت و التخطيط و تنظيم البيت ..
و ده خلانى أدرس تربية إيجابية للاطفال .. عشان أوصلهم فكرة انك تعمل الحاجة بحب مش مجرد هو كده و خلاص ♥️
ولما لاقيت الجيل ده مش عاوز يسيب الموبيل من ايده و بيقضى معظم يومه بيلعب Games فقررت أدخلهم من الحته بتاعتهم و درست ال Gamification عشان نتعلم و إحنا بنلعب ?
أثناء الفترة دى اتعاملت الحمد لله مع عدد لا بأس به من الامهات و الاطفال و المراهقين سواء فى الجلسات أو فى الكورسات ..
و بدأت أكتشف ان معظم مشاكل الولاد و البنات مع أمهاتهم او معاناة الامهات مع ولادهم بترجع لمشاكل و رواسب من الطفولة ..
فقولت بدل ما احنا بنعالج بس فى الكبار .. منمسك الخيط من أوله ..
و تخصصت كإستشارى تحفيزى معتمد و بقيت EC
(Encouragement Consultant )
وبقي هدفي وحلمي أني أساعد البنات بكل اللي محتاجينه وهما في بداية طريقهم
و فعلا ده طلع فى أكبر مشروع فى حياتى هو برنامج لافندر ..
و اللى إحتفلت بتخريج أول دفعة منه من أيام ?
و بحلم يكون عندى فى يوم من الأيام بيت كبير وأسميه بيت فانيليا ..
و يكون مفتوح لأى بنت و لأى ست .. شايفة نفسها فانيليا منين ماتروح تنشر الحب و السكن و الحنية .. حاجة كدة تحلى أى مكان تتواجد فيه ♥️
و ممتنه جدا لاشراقة و هاجر محمد لانهم كانوا السبب إنى أشتغل أونلاين بعد ما كنت مكتفية بالتدريب كحضور مباشر .. و ده من خلال كورس Be Online Trainer اللي ساعدني في كل التفاصيل اللي محتاجاها في عمل دورة أونلاين باحترافية ..
تقدروا تشوفوا أبلة فانيليا
وكل اللي بقدمه من خلال صفحتي
